समाचार
रहरहरू
तस्बिरहरू
सम्झनाहरू
लाग्छ,
उडानका पङ्ख हुन्.
विना रङ
विना रहर
कोलाहलबीच
सुमधुर धुनजस्तै
सुन्दर इन्द्रेणी
यी रङहरूले झल्काएका छन्
गाढा फिक्का पोतेका
धुँदा नि नजाओस झैँ
आखिर,
फरक रङ त के भो र !
त्यसले दिने सुन्दरता त उस्तै
शब्द व्याख्याको के अर्थ !
आऊ, तिमी पनि एकचोटि
हत्केलाहरू पोतेर हेर
अनि थाहा पाउनेछौ
रङको करिश्मा !
रहरको चमक !
अनि,
सौन्दर्यको आभा !
रङका रूपहरू अनेक होलान्
अनेक अनेक नजरहरू
तर भावहरू त एक हुन्
आखिर रङ नै त सूचक हैन !
ए, फगत एक रङमा रूमल्लिएकाहरू !
बाहिर त आएर हेर
सप्तरङ्गी इन्द्रेणी टल्केको
के, त्यहाँ विभेदको रङ छ र ?
उच निच, अभावको अर्थ छ र ?
समाजका वर्ग भनिनेहरू
समानताको आवाज फुक्नेहरू
बहुरूपी रङहरू
कुरीति र कुसंस्कार बोक्नेहरू
एकछिन त सोची हेर !
फरक रङ, फरक विचारका
सत्यहरूले
आक्रोशहरूले
अनि
सुन्दरताहरूले
विशाल हृदयमा
के फरक पर्दोरहेछ !
रङ त्यो फरक किन नहोस !
चाहे गाढा होस् या फिक्का
अस्तित्वको क्यानभास त उही नै
र त,
रङको रङ्गीनपन
दिग्भ्रमित छैनन्
जसरी बिहानीको रङ
गोधूलिको रङ प्रकट हुन्छ
के एउटा नै गति छ र ?
त्यसैले, आऊ !
रङ्गीन यो संसारमा
रङहरूको सम्मान गरौँ
पृथकतामा पुलकित बनौँ
रङमा के छैन ?
अनेक रङ नहुँदो हो त !
जीवन कहाँ हुन्थ्यो ?
जीवन्तता कहाँ भेटिन्थ्यो र !
फरक त्यहीँ छ
हेर्ने आँखामा
बुझ्ने मनमा
फराकिलो सोचमा
त्यसैले, आऊ
मानवताको रङमा
मायाको रङमा
अधेरी र उजेलीको रङमा
अनुपम सृष्टिमा
सपनाको रङ कोर्दै जाऊँ
हरेक ओठमा
मुस्कानको रङ थप्दै
रहरको तरेलीमा
रङ्गीन फूलहरू फक्राउँदै
जीवनको बगैँचाहरूमा ।
‘रश्मि’ नवोदित स्रष्टा हुन् ।
[email protected]
