काठमाडौँ ।

राष्ट्रिय युवा सेवा कोषले यस वर्षको अरनिको युवा कला पुरस्कार कलाकार सुरेम देशारलाई प्रदान गर्ने भएको छ । कोषले शुक्रबार एक विज्ञप्ति जारी गरेर त्यसबारे जानकारी गराएको हो । कोषद्वारा हरेक वर्ष यो पुरस्कार प्रदान गर्दै आएकोमा २०८२ सालका लागि देशार छनोटमा परेका हुन् ।

वरिष्ठ चित्रकार प्राज्ञ विजय थापाको संयोजकत्वको मूल्यांकन समितिले उक्त पुरस्कार कलाकार देशारलाई दिने निर्णय गरेको हो। कोषका सदस्य सचिव डा. विष्णुबहादुर भण्डारीले कलाको विकास र विस्तारमा निरन्तर योगदान दिएबापत कलाकार देशारलाई उक्त पुरस्का प्रदान गर्न लागिएको जानकारी दिए ।

ललितपुर जिल्ला चापागाउँका सुरेम देशार दुई दशकभन्दा बढी समयदेखि नेपाली आधुनिक चित्रकला कर्ममा सक्रिय छन् । कला विषयमा स्नातकोत्तर गरी कलाशिक्षणका साथै ग्रामीण क्षेत्रमा पुगेर चित्रकलाको प्रवर्धन र शिक्षामा काम गर्दै आएका छन् ।

नेपाली जनजीवन, प्राकृतिक सौन्दर्य, संस्कृति र सांस्कृतिक सम्पदाका विषयमा यथार्थवादी कला सिर्जना गर्ने कलाकार देशारले समसामयिक विषयवस्तुमा समेत चित्र बनाउँदै आएका छन् । गहिरो अवलोकन शक्ति, प्रकृति–प्रेम र मानवीय संवेदनालाई क्यानभासमा रूपान्तरण गर्ने कलाकार देशारका चित्रहरू रंग–रेखाको समष्टि मात्र होइन, भाव, स्मृति र समयका कथा बोकेर आउने जीवन्त अनुभूति हुन् ।

नारायणगोपाल युवा संगीत पुरस्कार रीतालाई
यसैगरी कोषले नारायणगोपाल युवा संगीत पुरस्कार गायिका रीता केसीलाई प्रदान गर्ने भएको छ । वरिष्ठ संगीतकार प्राध्यापक डा. दीपक जंगमको मूल्यांकन समितिले गायिका केसीलाई नउक्त पुरस्कारका लागि सिफरिस गरेको कोषका सदस्य सचिव भण्डारीले बताए ।

दाङ घर भएकी केसी करिब दुई दशकदेखि गायन क्षेत्रमा सक्रिय रहेको र हाल उनले संगीतमै विद्यावारिधि पनि गरिरहेको भण्डारीले बताए । यही मंसिर २० गते यो पुरस्कार केसीलाई प्रदान गरिनेछ । अरनिको युवा कला पुरस्कार भने आगामी माघमा मात्र हस्तान्तरण गरिनेछ । यी दुवै पुरस्कारको राशि ४०/४० हजार रुपैयाँ रहेको सदस्य सचिव भण्डारीले जानकारी दिए ।