काठमाडौँ ।

कलाकारिताका माध्यमबाट देश चिनाउने महाअभियानमा जुटेका कलाकार नगेन सिंह ठकुरीको ‘नेपाल कला यात्रा’ पुस्तक बजारमा आएको छ । विश्वको उत्कृष्ट गन्तव्य नेपाल बनाउने महाअभियान स्वरूप ७७ जिल्लाका १०१ गन्तव्यलाई कलाका रूपमा पुस्तकमा प्रकाशन गरिएको हो ।

शान्तिका अग्रदूत भगवान् गौतम बुद्धको जन्मस्थल लुम्बिनी, विश्वको सर्वोच्च शिखर सगरमाथा, विश्व सम्पदा पशुपतिनाथ, मुक्तिनाथ, लाङटाङ, चितवन राष्ट्रिय निकुञ्जका माध्यमबाट विश्वमञ्चमा नेपाल परिचित भए पनि ७७ वटै जिल्लाका विभिन्न स्थानमा रहेका धार्मिक, प्राकृतिक वा सांस्कृतिक सम्पदा क्यानभासमा उतारी ‘नेपाल कला यात्रा’ पुस्तक तयार गरिएको कलाकार सिंहले बताए ।

यस पुस्तक १९७ भाषामा अनुवाद गरी विश्वभरका विश्वविद्यालय र पुस्तकालयमा वितरण गरिने उनको भनाइ छ। देशका विभिन्न पर्यटकीय गन्तव्यमा पुगी त्यस ठाउँका कला उतारेका सिंहको यो अभियान २०६७ साल कात्तिक ६ गते बुद्ध जन्मस्थल लुम्बिनीबाट घोषणा गरिएको थियो । “अभियान घोषणासँगै २०७१ जेठ ३० गते ताप्लेजुङको पाथीभरा देवी मन्दिरबाट देशका ७७ वटै जिल्लामा कलायात्रा सुरु ग¥यौं”, उनले भने ।

सिंहको कलायात्रा पुस्तकको पहिलो कलाका रूपमा पानी रङमा पाथीभरा देवीको मन्दिर समेटिएको छ। कलायात्रा पुस्तकमा पाँचथरको स्वीजरल्याण्ड गाउँ, बाग्लुङको गाईघाट झरना, भक्तपुरको नगरकोट, चितवनको बीस हजारी ताल, धनुषाको जनकपुरधाम विवाहमण्डप, धनकुटाको भेडेटार र कृषि अनुसन्धान केन्द्र पाख्रीबास कलाका रूपमा समेटिएका छन् ।

अधिकांश कला पानी रंगका साथै एक्लेरिक रङमा कोरिएका छन्। पुस्तकमा गुल्मीको मुसीकोट दरबार र रेसुङ्गा, दोलखाको कुरीगाउँ, झापाको कन्काइ आर्यघाट, धनुषकोठी धाम र जामुनखाडी सिमसार, कपिलवस्तुको तिलौराकोट ‘पूर्वी ढोका’ कास्कीको ल्वाङ भिलेज होमस्टे, फेवा ताल, बेगनास ताल, सहिदचोक, चिसापानी रोयल ट्रयाक र तनहुँको ढोरबाराही समेटिएको छ ।

त्यस्तै काठमाडौंको धरहरा, कीर्तिपुको बाघभैरव मन्दिर, काभ्रेपलाञ्चोकको दोलालघाट, गोरखाको गोरखा दरबार, डडेलधुराको अमरगढी किल्ला, अछामको वैधनाथधाम, कालिकोटको पिली युद्ध संग्रहालय, मुगुको राराताल, अर्घाखाँचीको सुपा देउराली, सुर्खेतको बुलबुल ताल, सल्यानको कुपिन्डे ताल, बर्दीयाको बर्दिया राष्ट्रिय निकुञ्ज, रामेछापको जटापोखरी, पर्वतको जलजला, म्याग्दीको राखु भगवती मन्दिर आदि गन्तव्य कलामा समेटिएका छन् । उक्त अभियानमा पुस्तक प्रकाशका रूपमा नगेन न्यूज पब्लिकेशन प्रालिका साथै एक हजार ५६१ जना प्रत्यक्ष जोडिएका प्रालिका अध्यक्ष ज्योति हमालले बताए ।