समाचार
ङामग्याम्सेन जब सुपम्हाला दिनि
आफे ज्योइ ख्लासि निबा लानि नोन,
जिन्ला सुमधुर काइजुगुला बसन्त
डेला ग्यामह्राङबा काज्याङजुगु
गोइजिङला आङरे डेसि फाप्ला
कोम्हेन्दोला लाग्र्युङ म्हाङ
गिक्खे दुखह्राङ छ्योङचिला
सहरला गल्लि गल्लिजुगुरि ।
ल्हुइ ब्योङबा हिन्साम कोम्हेन्दोजुगु स्योङ दोसेला
ल्हुइ छ्याबा हिन्साम कोम्हेन्दोजुगु युङबा दोसेला
तासाइ थेनिजुगु न्हा स्योङ दोजि न्हा युङबान
ताजि जेक्खे ह्राङलान ल्हुइला कठघराला गिक्खे साक्षि
ब्योङचिबा बेइन्साफि दुइला आङसि
याबेङ स्योङला कुनिरि रुइचिजि
मुतेबा देन्बाला लागि
सोसिचिबा गिक्खे आब्रिबा दोङराप ।
ओस्बा ओस्बान
ह्याल म्हाइबान निमा सहररि
कोम्हेन्दोजुगु झनझन म्लाङगाइ ताला
ह्राङलान गाला क्रिपरि
सोसिचिला गिक्खे सादा म्हाङ
ङेसिचिला पिङगाइ जस्ताला दिम
म्हाइसिचिला म्हान्ज्यानाङ ताङबा
फालछेप्ला मि दुककाम्बा डुइग्याम्से
मिख्लि मिख्लिला ग्योइरि।।।
बाम्सिचिमुला जहा चु ह्युलला आङसि ।
पाङआखाम्बा दुइला गिक गिक ज्योइ
न्ह्युबा मुला कोम्हेन्दोला मिरि
ब्लोबा मुला दुइलान लि,
नाम्साहेन्से सहरदोना लमतन्न म्हेर्बा म्हाङ
थेन म्हाङजुगुला आब्लाप्बा ल्हामरि
कोम्हेन्दोजुगु याखारगिन ल्हुइरि
ल्होलो ल्होलो ल्हुइ सामचिला ।
तिला चु आजेबा दुइदा स्योइबारि खाम्ला
कोम्हेन्दोला मिसे रु
जो स्हुला चरमसिमारि नोन ह्याल ताजिला ।
तिला चु ब्यवस्था पोबारि खाम्ला
कोम्हेन्दोला कुक्पा काइसे ?
जो दिङ दिङहेन्से ङ्हारबा छुमचिमुला स्वतन्त्रताला ।
कोम्हेन्दोला बाम्बा मि
सातन सातन बसन्त च्याला
धर्गोगि ओन्छुप कुसि
दिङ दिङहेन्सेला आतोङबा म्हाङ
हाङसु ह्राङबा लानि स्योपन्हाङग्याम
खाइमा ताइला ताला
डेसि तोङजा म्हाङ
तरबारला स्युपह्राङ तासि खाइमा ताइला ताला ?
दुइला ख्राङगारि
कोम्हेन्दोलान ल्हुइ किन्सि
ङाला प्रिय कोम्हेन्दो ।
हेल्सि रहरला ब्याप
टाङसि सकसला कजुगु
लुङदारह्राङ ए
स्वतन्त्र ल्हिप्चिबा च्याबा सेम मुला ।
लक्ष्मी रूम्बा
लक्ष्मी रुम्बा कवि तथा साहित्यकार हुनुहुन्छ। ुअस्मिता हाम्रो पत्रिकाु तामांग भाषाको जर्नलको सम्पादक हुनुहुन्छ। विशेषगरी महिला जनजाति तथा सिमान्तकृत तथा पर्यावरणीय सचेतानाका लागी कार्यरत रुम्बाले कविता तथा निबन्धमा कलम चलाउनु भएको छ। मासिन्या नाटकको सहलेखक हुनुहुन्छ।
