डम्बर बिकेल

प्रकृतिको काखमा
घाम देख्छु दिनमा
घामसँगै रमाउँछु
जून देख्छु रातमा
जूनसँगै रमाउँछु

उर्वर बन्दछ माटो
अन्न मिल्दछ शरीरका निम्ति
पोषण पाउँछु जीवनका निम्ति
रहन्न कष्ट अनि

हुरहुर बल्दछ आगो
ताप मिल्दछ ज्यानलाई
प्रकाश पाउँछु अँध्यारोलाई
भाग्दछ पीर अनि

सिरसिर चल्दछ हावा
न्यानो मिल्दछ तनभरि
शीतल पाउँछु मनभरि
बिर्सन्छु दुःख अनि

कलकल बग्दछ पानी
सुधा मिल्दछ प्राणका लागि
शीतल पाउँछु त्राणका लागि
भुल्दछु पीडा अनि

शीतल वायुको हुन्छ जब स्पर्श
अमृत जलको हुन्छ जब स्पर्श
पाएर जब न्यानो घामको
पाएर शीतल जब जूनको
लिएपछि जब पोषण माटोको
पाएपछि जब ताप आगोको
मेरो मनमा छाउँछ तब वसन्त
अनि फक्रिन्छ एउटा सुन्दर फूल
सुगन्ध लिएर त्यही फूलको
चोरेर मुस्कान त्यही फूलको
हाँसेको छु म
नाचेको छु म
बाँचेको छु म
प्रकृतिको काखमा

डम्बर बिकेल
[email protected]