गोविन्द्र राज तिमिल्सेना

दशैँ आयो, तिहार आयो, प्रदेशमै हुनु परेको छ,
याद आउँदा गाउँघरका तस्बिर छुनु परेको छ ।
विरानो मुलुक अनि टन्टलापुर चर्को घाममा,
पसिना बगाएर दिनभरि खाडीमै रुनु परेको छ ।।

वर्षदिनमा दशैँ, तिहार आउँदा खुसी छाएको छ,
धेरैपछि सबैको माया पाउँदा खुसी छाएको छ ।
नाच्दै गाउँदै एकआपसमा देउसी र भैलो भन्दै,
साथीभाइ मिलेर सबै रमाउँदा खुसी छाएको छ ।।

आफ्नै गाउँघर जाऊँ झैँ लाग्दै छ होला,
यो मन पनि कताकता रमाउँदै छ होला ।
ढकमक्क फूल फुले होलान् गाउँघरमा,
दशैँ र तिहारले रमाइलो छाउँदै छ होला ।।

मेलापात र लेकबेँसी डुलेका, कति रमाइलो !
मखमली फूलसमेत फुलेका, कति रमाइलो !
मनै लोभ्याउने क्या सुन्दर दृश्य गाउँघरतिर,
लहलह खेतमा धान झुलेका, कति रमाइलो !।

गोविन्द्र राज तिमिल्सेना, बडीमालिका नगरपालिका–७, बाजुरा ।