अमेरिका अन्तर्राष्ट्रिय नेपाली साहित्य समाज (अनेसास) द्वारा आयोजित नवौँ अन्तर्राष्ट्रिय नेपाली साहित्य सम्मेलनको अवसर पारेर कवि बद्री दाहालको कविता सङ्ग्रह ‘क्षितिज पारीको आँगन’ विमोचन गरिएको छ । अमेरिकाको कोलोराडोमा सम्पन्न सम्मेलनमा अनेसासका पदाधिकारी तथा सदस्यहरूले आ–आफ्ना रचना वाचन गर्नुका साथै भजन–कीर्तन र विविध सांस्कृतिक कार्यक्रमसमेत प्रस्तुत गर्नुभएको थियो ।

साहित्यकार नवराज लम्साल को प्रमुख आतिथ्यतामा सम्पन्न कार्यक्रममा अनेसासका केन्द्रीय अध्यक्ष सर्वज्ञ वाग्लेको अध्यक्षता रहेको थियो । सो अवसरमा बोल्दै लम्सालले कवि दाहालका कृतिमा गहिरो संवेदना, कविताप्रतिको तृष्णा र समयसापेक्ष चेतना प्रकट भएको उल्लेख गर्नुभयो ।अनेसास बोर्ड अफ ट्रस्टीका सभापति पदम विश्वकर्माले दाहाललाई सक्रिय र ऊर्जाशील स्रष्टाका रूपमा चित्रण गर्दै उहाँका गद्य, पद्य र गजल सबै विधामा सशक्त उपस्थिति रहेको बताउनुभयो । उहाँले दाहालको वाचन शैलीले श्रोतालाई मन्त्रमुग्ध बनाउने उल्लेख गर्नुभयो ।

कवि तथा गीतकार लालगोपाल सुवेदीले दाहाल नेपाली भाषा, साहित्य र संस्कृतिको संरक्षण तथा प्रवद्र्धनमा सक्रिय सर्जक भएको बताउँदै उहाँका कृतिमा देशप्रेम, युद्धप्रति असहमति, मानवीय संवेदनशीलता र प्रेमका विविध आयाम प्रस्तुत भएको बताउनुभयो । ‘क्षितिज पारीको आँगन’ दाहालको पहिलो कविता तथा गजल सङ्ग्रह हो । केन्टकी राज्यको लुइसभिलमा बसोबास गर्दै आउनुभएको दाहालले व्यस्त प्रवासी जीवनका बाबजुद साहित्य सिर्जनालाई निरन्तरता दिनुभएको छ । सम्मेलनमा नेपाल तथा विभिन्न देशबाट आउनुभएको करिब दुई सयभन्दा बढी साहित्यकार, लेखक तथा साहित्यप्रेमीहरूको सहभागिता रहेको थियो ।