काठमाडौं ।

बेलायत निवासी कवि शान्ति लिम्बू सेलिङको पाँचौँ कविता संग्रह ’थेम्सको लहरमा तमोरको स्पर्श’ विमोचन भएको छ । काठमाडौंमा आयोजित एक कार्यक्रमबीच कृतिको विमोचन गरिएको हो । साहित्यकार खगेन्द्र संग्रौलाको प्रमुख आतिथ्यमा भएको विमोचन समारोहमा चलचित्र निर्देशक नवीन सुब्बा, कवि विमला तुम्खेवा, डा. तुलसी गौतम, समालोचक सुशान्त गुरुङ, गायिका झुमा लिम्बु तथा आयोजक समितिका अध्यक्ष खिम सेलिङलगायत साहित्यकार, कलाकारलगायत उपस्थित थिए ।

कविता संग्रहले दुई फरक भूगोल र संस्कृति– लिम्बू संस्कृतिको उद्गम स्थल तथा पूर्वी नेपालको पाँचथरको तमोर नदी र लन्डनको थेम्स नदीलाई जोड्ने बताइएको छ । कवयित्रीले यी दुई नदीका माध्यमबाट मातृभूमि र प्रवासी जीवनबीचको भावनात्मक द्वन्द्व र सांस्कृतिक सम्बन्धलाई सशक्त रूपमा उजागर गरेकी छन् । संग्रहका कविताहरूले सांस्कृतिक पहिचान र लिम्बू परम्परा, प्रवासी अनुभूति र नोस्टाल्जिया, नारी चेतना र प्रतिरोध, प्रकृति र मानवीय संवेदना, गोर्खा भर्तीको पुनर्विचारको मागलगायतका विषय समेटेको जानकारी दिइएको छ ।

समालोचक सुशान्त गुरुङले यो कृतिलाई ’तमोर र थेम्स’ दुई फरक सभ्यतालाई जोड्ने ’कवितात्मक भूगोल’को संज्ञा दिए । उनले कवयित्रीका कविताहरूलाई ’प्रतिरोधको भाषा’ भन्दै प्रतिरोधी स्त्री चेतनाको सशक्त अभिव्यक्ति भएको बताए । कवि विमला तुम्खेवाले लिम्बूको स्वलेखकीय शैलीको प्रशंसा गर्दै यो संग्रहलाई ’शक्तिशाली भावनाहरूको दस्तावेज’ भनी उल्लेख गरिन् र नेपाली साहित्यमा उनको प्रभावशाली उपस्थितिलाई रेखांकित गरिन् ।

डा. तुलसी गौतमले यो कृति नारी संवेदनाको दृष्टिले अब्बल भएको बताउँदै ’किन किनारिन्छन् आमाहरू ?’ र ’प्रेम’ जस्ता कविताहरूमा नारी संवेदना अत्यन्त सशक्त ढंगले प्रकट भएको उल्लेख गरे । खगेन्द्र संग्रौलाले यस कृतिमा देश छोड्नुपर्ने विवशता, प्रवासी जीवनका पीडा, मानव अस्तित्वका जरा र नारी चेतनाका विषयहरू समेटिएको बताए । चलचित्र निर्देशक एवम् कवि नवीन लिम्बुले कृतिमा याक्थुम चेतना, समग्रता, सहअस्तित्व र महिलावादका विषयहरू रहेको उल्लेख गरे ।

शान्ति लिम्बू सेलिङ बेलायत निवासी नेपाली कवि हुन् । नेपाली साहित्य र सामाजिक क्षेत्रमा उनको सक्रिय उपस्थिति रहँदै आएको छ उनका रचनाहरूमा लिम्बू संस्कृति र नेपाली पहिचानको गहिरो छाप पाइन्छ यो उनको पाँचौँ कविता कृति हो । “साहित्य मेरो लागि भावनाको अभिव्यक्ति मात्र होइन, समाजसँग जोडिने सेतु पनि हो,“ उनी भन्छिन् ।