काठमाडौँ–

दायित्व वाङ्मय प्रतिष्ठान, नेपालका अध्यक्ष रामप्रसाद पन्तको अध्यक्षतामा हालै बसेको कार्यसमितिको बैठकले २०८२ सालका विभिन्न चार पुरस्कारहरूको निर्णय गरेको छ । जस अन्तर्गत प्रतिष्ठानले यस वर्ष शङ्कर कोइराला आख्यान पुरस्कार (२५,०००/– रुपैयाँसहित) आख्यानकार मधुवन पौडेललाई, चूडामणि भाषाव्याकरण–कोश पुरस्कार (५१,१११/– रुपैयाँसहित) साहित्यकार तथा भाषासेवी रोचक घिमिरेलाई, कुमार–सरस्वती समालोचना पुरस्कार (२५,०००/– रुपैयाँसहित) समालोचक तथा साहित्यकार प्रा. डा. लक्ष्मणप्रसाद गौतमलाई र रामप्रसाद पन्त वाङ्मय पुरस्कार (५५,५५५/– रुपैयाँसहित) साहित्यकार, सम्पादक तथा नाट्यकर्मी किशोर पहाडीलाई समर्पण गर्ने निर्णय गरेको छ ।

यी पुरस्कारहरू आगामी पुस २६ गते काठमाडौँमा एक समारोहको आयोजना गरी समर्पण गरिने प्रतिष्ठानले जानकारी गराएको छ । दायित्व वाङ्मय प्रतिष्ठान, नेपाल २०५७ सालमा स्थापना भई भाषासाहित्यका क्षेत्रमा समर्पित संस्थाका रूपमा परिचित छ ।