काठमाडौँ ।

गीतकार खेमनाथ दाहालको ‘बित्छ बिहान आमाको’ गीत सार्वजनिक भएको छ। डा.यज्ञश्वर निरौलाको प्रमुख आतिथ्यमा काठमाडौंमा एक विशेष कार्यक्रमबीच उक्त गीतको भिडियो सार्वजनिक गरिएको हो। विशिष्ठ गायिका ज्ञानु राणाको स्वरमा रहेको गीत महाकाव्यकार दाहालको कृति ‘योद्धा’ मा रहेको काव्यलाई कीर्तिमानी संगीतकार सन्तोष श्रेष्ठको संगीत गरेका हुन् ।

मिलापको आयोजनामा साहित्यकार लेखनाथ पोख्रेलको अध्यक्षतामा भएको कार्यक्रममा गीता अधिकारीले स्वागत मन्तव्य राख्दै मिलापका पछिल्ला कार्यको चर्चा गरेकी थिइन्। कीर्तिमानी संगीतकार श्रेष्ठले काव्यबाट लिएको हुनाले आफूहरूले छन्दभंग नहुने गरी गीत तयार पारिएको बताए । डा. बुनु दाहालले महाकाव्यकार दाहालका कृतित्व र व्यक्तित्वबारे आफू परिचित रहेको बताउँदै उनका साहित्य सिर्जनाको विशिष्ट गुण रहेको आफूले पाएको बताइन् ।

यस्तै विशिष्ठ कलाकार उत्तम केसीले गीतका शब्द अत्यन्तै मार्मिक रहेको बताउँदै ‘आमा’ शब्दमा रचना गरिएको गीत उत्कृष्ट रहेको बताए । गीतकार संघका अध्यक्ष वसन्त वित्यासी थापाले साहित्यमा एउटा उचाइ प्राप्त गरेको व्यक्त दाहाल गीतकारका रूपमा पनि त्यत्तिकै सशक्त देखिएको बताए । जनकविकेशरी धर्मराज सावित्री थापा स्मृति प्रतिष्ठानका अध्यक्ष मदन थापाले गीतको समीक्षा गर्दै एउटा उत्कृष्ट गीत श्रोता÷दर्शकमाझ आएको बताए। पछिल्लो समय यस्ता शब्दमा गीत नआउने गरेको गुनासो गर्दै वरिष्ठ गायिका राणाले महाकाव्यकार दाहालका उत्कृष्ट शब्द रचना रहेको बताए ।

महाकाव्यकार दाहालले आफूले ‘योद्धा’ काव्यमा समावेश गरेका पंक्तिलाई सन्तोष र ज्ञानु दिदीको सहकार्यमा यो गीत रकेर्ड गरिएको बताए । ‘योद्धा’ काव्य कसरी तयार भयो भन्ने सन्दर्भ उनले प्रस्तुत गरेका थिए । मिलापका सम्पादक कृष्ण भुसालले सञ्चालन गरेको कार्यक्रममा प्रमुख अतिथि डा. निरौलाले ‘योद्धा’ काव्यको चर्चा गरे। उनले महाकाव्यकार दाहालका कृतित्व र व्यक्तित्वबारे भनाइ राखेका थिए ।

संगीत र काव्यको सजीव संयोजनले तयार भएको ‘बित्छ बिहान आमाको’ आमाप्रतिको प्रेम मात्र नभएर, नेपाली साहित्य र संगीतको साझा पहिचानको प्रतीक बन्न सफल भएको डा. निरौलाको भनाइ थियो। ‘योद्धा’ काव्यलाई महाकाव्यका रूपमा ल्याउन उनको सुझाव थियो । राजु कार्कीको संगीत संयोजन ‘बित्छ बिहान आमाको’ मा दिल समर्पणको संगीतसञ्चयन, प्रकाश मिश्रको संगीत सम्पादन छ। अकस्टिक नेपाल संगीतसञ्चयन कक्ष रहेको यो गीतको भिडियोलाई त्यही नै राजन खरेलले सम्पादन गरेका हुन् ।

महाकाव्यकार खेमनाथको २०६० सालमा प्रकाशित काव्य कृति हो ‘योद्धा’। यसै योद्धाबाट केही दिनअघि ‘लाली गुराँसको साटो’ गीत सन्तोषको स्वर र संगीतमा सार्वजनिक भएको थियो। यस्तै उहाँको ‘स्वेतपत्र’ महाकाव्यबाट पनि सन्तोषको स्वर र संगीतमा ‘बुद्धको देश नेपाल’ श्रोतादर्शकमाझ आएको छ । लाब्री, तेह्रथुमका साहित्यकार दाहालका ‘श्वेतपत्र’ (महाकाव्य), ‘रश्मि’ (खण्डकाव्य), ‘श्रद्धाञ्जलि, योद्धा, हावर्डको चौतारीमा, म त बन्दी भएको छु’ जस्ता कवितासंग्रह, ‘यात्राको सिकर्नी’ नियात्रा, ‘अहोरात्र’ उपन्यास र ‘सिर्जनामा दृष्टि’ भूमिकासंग्रह उनकाप्रकाशित कृति छन् ।