मोरङ

मोरङको विराटनगरमा मोती जयन्ती विशेष कार्यक्रम भएको छ। ‘छन्दवाटिका नेपाल, विराटनगर’ को आयोजनामा जीवनी, व्यक्तित्व र कृतित्वको चर्चा तथा रचना वाचन गरेर मोतीराम भट्टको १६० औं जन्म जयन्ती मनाइएको हो ।

प्राध्यापक कविराज न्यौपानेको प्रमुख आतिथ्यमा भएको कार्यक्रममा समालोचक केशु विरहीले मोतीरामको जीवनी, व्यक्तित्व र कृतित्वको चर्चा गरेका थिए। विरहीले मोतीरामलाई विशेष गरेर अन्वेषक, कवि, गजलकार, पत्रकार, जीवनीकार, समालोचक, नाटककार, कुशल व्यवस्थापक, शृङ्गारिक धारा तथा समस्यापूर्ति लेखनका प्रारम्भकर्ता, पुस्तकालयका संस्थापक, मुद्रण आरम्भकर्ता तथा प्रेरणाका स्रोतका रूपमा चिनाए। विरहीले ३० वर्ष मात्रै बाँचेर पनि नेपाली साहित्यमा भट्टले अमूल्य योगदान पुरयाएको बताए ।

संस्थाका सचिव चिरञ्जीवी काफ्ले सञ्चालन गरेको उक्त कार्यक्रममा बाबुराम पोखरेल, जीवन काश्यप, गोपाल निर्भीक, जीवन ढुङ्गाना, प्रिन्स प्रमोदकुमार ढकाल, चूडामणि नेपाल, रमेश निरौला, नवराज पोखरेल ‘नवशिला’, चिरञ्जीवी काफ्ले, सिजन श्रेष्ठ, राधा भट्टराई, उमानाथ घिमिरे सगर, शुभलक्ष्मी लम्साल, डोमी कामत, कृष्ण अञ्जान, मञ्जु घिमिरे दाहाल, पुण्य चौलागाईँ आदि स्रष्टाहरूले रचना वाचन गरेका थिए। कार्यक्रममा मोतीराम विशेष रचनाका साथै स्वतन्त्र रचना समेत वाचन गरिएका थिए ।

उक्त कार्यक्रममा प्राज्ञ खेम नेपाली, कोसी साहित्य–कला परिषद् नेपालका तदर्थ समिति अध्यक्ष केशु विरही, विराटनगर प्रज्ञाप्रतिष्ठानका सचिव दिनेशराज सुवेदी, प्रज्ञापरिषद् सदस्य शुभलक्ष्मी लम्साल, मुक्तक प्रतिष्ठान नेपाल कोसी प्रदेशका अध्यक्ष बाबुराम पोखरेल, सङ्गम अभियान पत्रिकाका पत्रिकाका प्रधान सम्पादक रामबाबु दाहाल लगायतको उपस्थिति रहेको थियो ।

उक्त कार्यक्रममा संस्थाका तर्फबाट शारदा भट्टराईले उपस्थित सबैलाई शब्दद्वारा स्वागत गरेकी थिइन्। त्यस्तै संस्थाका अध्यक्ष हरि कट्टेलले कार्यक्रमको औचित्यमाथि प्रस्ट पारेका थिए। २०७० सालमा स्थापित यस संस्थाले विशेष गरेर नेपाली साहित्यमा छन्दलेखनलाई विशेष प्राथमिकतामा राखेर आफ्ना गतिविधि सञ्चालन गर्दै आएको छ ।