समाचार
नेपाल खेलकुद प्रतिष्ठान खोटाङले ‘दोस्रो बृहत् खोटाङ,हलेसी खेलकुद, साहित्यिक तथा पर्यटन महोत्सव –२०८२’ को अवसर पारेर कवि कुन्ता शर्मा र जिल्ला समन्वय समिति खोटाङका पूर्व प्रमुख बबि चाम्लिङलाई सम्मान गरेको छ । खेलकुद प्रतिष्ठानले सुनसरीकी कवि शर्मा र दिक्तेल रुपाकोट मझुवागढी नगरपालिका-५ लफ्याङका पूर्व जिसस प्रमुख चाम्लिङलाई जनही ११ हजार १११ नगदसहित सम्मान गरेको हो ।
नेपाल खेलकुद प्रतिष्ठान खोटाङका अध्यक्ष सञ्जयकुमार राईले नेपाली साहित्यको क्षेत्रमा र्पुयाएको योगदानको कदर गर्दै कवि शर्मालाई र पूर्व कार्यक्रम संयोजक भएकाले चाम्लिङलाई सम्मान गरेको बताए । नेपाल प्रज्ञाप्रतिष्ठानका सदस्य सचिव डा. धनप्रसाद सुवेदीले कवि शर्मालाई र सहायक प्रमुख जिल्ला अधिकारी सागर साहले चाम्लिङलाई दोसल्ला ओढाएर ताम्रपत्रसहित सम्मान गरेका हुन् । खोटाङ, दिक्तेलको खोटाङ बहुउद्देश्यीय कभर्डहलमा आयोजित महोत्सवमा कवि तथा कवयत्रीहरूले आ-आफ्नो रचना वाचन गरेका थिए ।
महोत्सव अन्तर्गत गत वैशाख–२७ गते खुला महिलारपुरुष हाफ म्याराथनसहित विभिन्न दौड प्रतियोगिता आयोजना गरिएको थियो । हाफ म्याराथनको दुवै उपाधि विजेता नेपाली सेनाका पूर्णलक्ष्मी न्यौपाने र सञ्जय श्रेष्ठले जनही ७७ हजार ७७७ नगदसहित ट्रफी, मेडल र प्रमाणपत्र जितेका छन् । यस्तै, वैशाख–३० गते ३१ गते भएको राष्ट्रिय बुद्धिचाल र टेबलटेनिस प्रतियोगितामा राष्ट्रिय बुद्धिचाल प्रतियोगिताको उपाधि पूर्वनेपाल च्याम्पियन ललितपुरका बद्रीलाल नेपालीले जितेका थिए। उपाधि विजेता नेपालीले नगद २५ हजारको साथमा ट्रफी, मेडल र प्रमाणपत्र प्राप्त गरेका छन् ।
खुला राष्ट्रिय टेबलटेनिस प्रतियोगिता अन्तरगत सिनियर पुरुषतर्फ एभिएम टेबलटेनिस क्लब ललितपुरका सुजन गदाल प्रथम, जुनियर महिलातर्फ एभिएम टेबलटेनिस क्लब ललितपुरकै साइरा शाक्य र जुनियर पुरुषतर्फ एभिएम टेवलटेनिस क्लब ललितपुरकै जयस्नु महर्जन प्रथम भएका थिए । राष्ट्रिय टेबलटेनिस प्रतियोगिताका उपाधि विजेता गदालले २५ हजार नगदसहित ट्रफी, मेडल र प्रमाणपत्र प्राप्त गरेका छन् ।
खेलकुदको माध्यमबाट खोटाङला क्षेत्रमा परिचित गराउन महोत्सवको आयोजना गरिएको आयोजकले जनाएको छ । महोत्सवका लागि जिल्ला समन्वय समिति खोटाङका प्रमुख सनबहादुर राईको संयोजकत्वमा मूल आयोजक समिति गठन गरिएको थियो ।
