• २०८१ श्रावाण १० बिहीबार

शान्ति

बसन्त चौधरी

बसन्त चौधरी

खै किन हो
यो स्वप्निल यात्रामा
कसरी आइपुगेँ
यस्तो भीडमा
खोज्दैखोज्दै तिमीलाई

लुक्दा लुक्दै दुःखहरूसँग
झुक्याउँदा झुक्याउँदै
खुसीहरूलाई
कैयौँपटक झरेर
अत्यासको पहाडबाट
कतिपटक अल्झिएर
विश्वासका तारहरूसँग
आइपुगेँ म
यस्तो भीडमा
खोज्दैखोज्दै तिमीलाई

आफूसँग भाग्दाभाग्दै
ठोक्किँदै र लत्रिँदै
जीवनको उत्तरार्धको
यो सोपानमा
खै किन हो आशातीत भावमा
कसरी आइपुगेँ म
खोज्दैखोज्दै तिमीलाई
यस्तो भीडमा
के तिमी शान्ति हौइनौ ?

साभार: तिमीविनाको म (कवितासङ्ग्रह)


[email protected]
(चौधरी विशिष्ट साहित्यकार हुन् ।)