• २०८१ असार २८ बिहीबार

तिमीलाई के भनौँ

बसन्त चौधरी

बसन्त चौधरी

कहिले काँडा भएर घोच्छौ
कहिले फूल भएर फुल्छौ
तिमीलाई के भनौँ मायालु
मेरो मनको आकाशमा
सधैँ जून भएर झुल्छौ

अनुहार चन्द्रमा केश रात छ
एकातिर गीतको सुर तिमी
अर्कोतिर विरहको आघात छ
आँधीहुरी धेरै छन् तर सन्तोष यौटै छ
जीवनमा कहिल्यै नछुट्टिने
हाम्रो न्यानो साथ छ ।

तृष्णा हौ कि तृप्ति हौ तिमी ?
चाहना हौ कि प्रीति हौ तिमी ?
मेरो जीवनको उदास गोरेटोमा
मलाई हिँड्न सिकाउने दीप्ति हौ तिमी

चाहना छ, तिर्खा छ, तिमीलाई भेटने रहर छ
वसन्त छ, फूल छ, तिम्रो रूपको लहर छ
आँखा छन्, दृश्य छन्, रातको अन्तिम प्रहर छ
शरीर छ, अँगालो छ तर पर्खाल बन्ने
यौटा सिँगो सहर छ ।

साभार: तिमीविनाको म (कवितासङ्ग्रह)


[email protected]
(चौधरी विशिष्ट साहित्यकार हुन् ।)