• २०८१ श्रावाण ३ बिहीबार

भारती खरेल स्मृति पुरस्कार- २०७७ प्रदान

काठमाडौँ, मङ्सिर ।

भारती खरेल प्रतिष्ठानले विभिन्न व्यक्तिलाई पुरस्कृत गरेको छ । समाजसेवी तथा साहित्यकार भारती खरेलको ८५औँ जयन्ती तथा ३०औँ स्मृति दिवसका अवसरमा प्रतिष्ठानद्वारा शुक्रबार यहाँ आयोजित पुरस्कार समर्पण कार्यक्रममा वरिष्ठ गीतकार किरण खरेललाई साहित्य सिर्जना क्षेत्रमा सम्मानपत्र र नगदराशि ५१ हजार रुपियाँसहित ‘भारती खरेल स्मृति पुरस्कार–२०७७’ प्रदान गरियो ।

त्यसैगरी समाजसेवाका लागि वरिष्ठ समाजसेवी श्रीमती अनुराधा कोइरालालाई ‘भारती खरेल स्मृति पुरस्कार– २०७८’ प्रदान गरियो । कोइरालाको अनुपस्थितिमा उहाँको पुरस्कार माइती नेपालका कार्यकारी निर्देशक विश्व खड्काले ग्रहण गर्नुभयो । प्रा. डा.  वासुदेव त्रिपाठीलाई ‘भारती खरेल स्मृति पुरस्कार–२०७९’ प्रदान गरियो । नेपाल प्रज्ञा–प्रतिष्ठानका निमित्त कुलपति प्रा.डा. जगमान गुरुङले प्रतिष्ठानका तर्फबाट उहाँहरूलाई पुरस्कार प्रदान गर्नुभयो ।

निमित्त कुलपति गुरुङले साहित्यसाधिका भारती खरेलको समाजसेवा, साहित्य सिर्जना र अध्यात्म साधनाबारे प्रकाश पार्दै नेपाली भाषा साहित्य, समाजसेवा र अध्यात्म साधनाको क्षेत्रमा योगदान पुर्याउने व्यक्तिहरूलाई यस प्रतिष्ठानले उत्प्रेरित गर्दै आएको चर्चा गर्नुभयो ।