समाचार
अशान्तिले जरा फैलाउँदै गर्दा
विकृतिले वर्चस्व राख्दै गर्दा
समय खुम्चिएको हो कि
बदलिएको हो
अथवा रोकिएको पो हो कि
धकेलिएको हो
र म आफूलाई सङ्क्रमित युगको
जीवको रूपमा भेट्टाउँदैछु
जो विवश छ
बाध्यताको साङ्लोमा
हराएको छ त्यही भुमरीमा
आफू आफैँ नरही
के-के हो खोजिरहेछ
भौँतारिँदै संसार-सागरमा
हो ! म त्यही सङ्क्रमित युगको
एक रुख हुँ
जसका जराहरूमा लागिरहेछ
किरा
जसका हाँगाहरूमा फक्रेको छ शिशिर
युगको क्रन्दनमा अड्किएका छन्
सुक्दैगएका पातहरू
र
रुग्ण समयका छातीहरूमा
निस्पृह बनेको छु म
विस्तारित भैरहेको जीवनीय सङ्क्रमणमा
रोगी र सङ्क्रमित म
युगको प्रगति हाँक्ने
सभ्यताको आनन्द बोक्ने
सङ्क्रमित समयको एकपल हुँ
जो आफैँसँग द्वन्द्वरत छ ।
साभार: तिमीविनाको म (कवितासङ्ग्रह)
[email protected]
(चौधरी विशिष्ट साहित्यकार हुन् ।)
