• २०८१ मंसिर २९ शनिवार

नेपालीकला साहित्य डट कम प्रतिष्ठानद्वारा पाल्पाका दुई स्रष्टा सम्मानित हुँदै

काठमाडौ, नेपालीकला साहित्य डट कम प्रतिष्ठानले विभिन्न स्थानमा रहेका स्रष्टालाई सम्मानगर्दै आएको छ । यो पटक पाल्पामा बसेर साहित्य साधना गरिरहेका पुष्कर अथक रेग्मी र स्रष्टा राजेन्द्रगोपाल सिंहलाई पुरस्कृत गर्ने भएको छ । प्रतिष्ठानले योगेश्वर स्मृति प्रतिष्ठानद्वारा स्थापित रु. २५,०००।- राशिको योगेश्वर वाङ्मय पुरस्कार रेग्मीलाई र नेपालप्रेमी स्व. ग्रगोरी जी. मस्कारिनेक द्वारा स्थापित र २०,०००।- राशिको ग्रेगरी कला संस्कृति पुरस्कार सिंहलाई प्रदानगर्ने भएको हो ।

योगेश्वर स्मृति प्रतिष्ठानका अध्यक्ष एवम् पुरस्कार संस्थापक समेत रहेका कवि राजेश्वर कार्कीको अध्यक्षतामा बसेको बैठकले सिंह र रेग्मीको साहित्यिक योगदानको सम्मान स्वरुप पुरस्कृत गर्ने निर्णय गरेको हो । दुवै पुरस्कार आगामी कार्तिक १९ गते पाल्पामा हुने सिर्जना उत्सवमय विशेष समारोहमा समर्पण गरिने कला साहित्य डट कम प्रतिष्ठान अध्यक्ष एवं साहित्यकार मोमिलाद्वारा जारी विज्ञप्तिमा उल्लेख गरिएको छ ।

प्रतिष्ठानले यस अघि यी पुरस्कारहरू क्रमशः रोल्पाका स्रष्टाद्वय श्री डी.बी टुहुरो र नवीन विभासलाई प्रदान गरेको थियो । ‘सद्भाव र सिर्जना’को मूलमन्त्र सहित राष्ट्रको साझा सवाल र गौरव नेपालीकला, साहित्य, सङ्गीत, संस्कृति, दर्शन, इतिहास एवम् विविध क्षेत्रमा सम्मान तथा पुरस्कार स्थापन, अध्ययन अनुसन्धान, प्रकाशन, सम्मेलन, भ्रमण, विमर्श, गोष्ठी आदि काम गर्दै आएको नेपालीकला साहित्य डट कम प्रतिष्ठानले नेपालीभाषा, साहित्यका क्षेत्रमा अनुकरणीय काम गर्दै आएको छ ।