• २०८० फागुन ९ बुधबार

छिन्नलता गीत पुरस्कार अर्पण कार्यक्रम सम्पन्न

हिजो आइतबार हरिशयनी एकादशी २६ असार छिन्नलता गीत पुरस्कार गुठीद्वारा सातदशकदेखि हालसम्म नेपाली गीत संगीतमा साधनारत विशिष्ट साधकहरूलाई पूर्व प्रधानमन्त्री केपी ओलीले नगदसहित प्रमाणपत्र प्रदान गर्नु भयो ।

गुठीका सचिव गीतकार दिनेश अधिकारीले स्वागत मन्तव्य राख्नु भएको थियो । दुई वर्ष कोरोनाका कारण स्थगित भएको सम्मान पुरस्कार पनि यसै वर्ष प्रदान गरिएको छ । छिन्नलता गीत पुरस्कारद्वारा सम्मानित तथा पुरस्कृत हुने बि सं २०७६ का लागि जसयोञ्जन प्यासी (गीत रचना) हरि लम्साल (संगीत रचना ) सुनिता सुब्बा (गायन)लाई सम्मान पुरस्कार प्रदान गरिएको छ ।

बि सं २०७७ का लागि आनन्द अधिकारी (गीत रचना) शान्तिराम राई (संगीत रचना) शम्भु राई (गायन) यसैगरी बि सं २०७८ का लागि वसन्त चौधरी (गीत रचना) आनन्द राई (संगीत रचना) पवित्र सुब्बा -गायन)लाई सम्मान पुरस्कार प्रदान गरिएको छ । छिन्नलता गीत युवा प्रतिभा पुरस्कार अस्मिता अधिकारी (२०७६) मिलन नेवार (२०७७) एलिना चौहान(२०७८)लाई सम्मान पुरस्कार प्रदान गरिएको छ ।

बि सं २०७८ को छिन्नलता गीत विशेष सम्मान वरिष्ठ संगीतकार कर्म योञ्जनलाई प्रदान गरिएको छ । गुठीको सह सचिव डा गीता त्रिपाठीद्वारा सम्मानित प्रतिभाहरूको परिचय सम्मानित सभालाई राख्नु भएको थियो । सम्मानित प्रतिभाहरूको तर्फबाट श्रीमती जसयोन्जन प्यासीले बोल्नु भएको थियो । प्यासी अस्वस्थ भएको कारण श्रीमती प्यासीले उक्त सम्मान पुरस्कार ग्रहण गर्नु भएको थियो ।

यसैगरी गायिकाको तर्फबाट सुनिता सुब्बाले बोलेकी थिइन । बि सं २०७८ को गीत रचनाबाट सम्मानित हुने प्रतिभा गीतकार वसन्त चौधरीले वरिष्ठ गीतकार श्रीमती रमोलादेवी शाह छिन्नलताको १००औं जन्मजयन्तीमा आफू सम्मानित हुन पाउँदा गौरवबोध भएको र आफ्नो अश्रुमिश्रित नयनबाट श्रद्धा व्यक्तगर्नु भयो र छिन्नलताको नाम युगौँसम्म रहने बताउनु भयो ।

छिन्नलता गीत विशेष सम्मान प्राप्तगर्नु हुने वरिष्ठ संगीतकार कर्म योन्जनले आफूले निरन्तर साधनागर्दै आएकोमा गुठीले सम्मान गर्दा खुशी लागेको बताउनु भयो । गुठीको उत्तराधिकारी छिन्नलताको पनाती १३ वर्षको कविले वातावरण सम्बन्धि अंग्रेजी कविताको रचनावाचन गरेका थिए । गायिका मिलन नेवारले उनको चर्चित गीत“फूलबुट्टे सारी’गाएकी थिइन ।

गायक शम्भु राईले झुपडीमा बस्नेलाई नूनको पीर, महलमा बस्नेलाई सुनको पीर गाएका थिए । उक्त कार्यक्रममा छिन्नलताको रचना, गायक फत्तेमान राजभण्डारीको स्वरको गीत सांगीतिक समूहका एक गायकले प्रस्तुत गरेका थिए । कार्यक्रम गुठीको अध्यक्ष प्रा डा वासुदेव त्रिपाठीको सभापतित्वमा सञ्चालन भएको थियो । कार्यक्रम सञ्चालन नरेश भट्टराईले गरेका थिए ।