समाचार
त्यो तिमी नै हौ
आधा खुलेको द्वारको काप्चामा लुकेर
बूढी औँला लुकाएर
तिउरी लगाइएका चार औँलाको नङ्गमात्र देखाएर
आधा आँखाले नियाल्दै गरेकी
त्यो तिमी नै हौ !
चट्र्याङ्गले मुटु कम्पाउँदा
तकियालाई, म सम्झेर
ग्वाम्ल्याङ्ग छातीमा च्यापेकीपनि
त्यो तिमी नै हौ !
झरीको ताण्डप सङ्गीतमा
आँगनमा नाच्दै/उफ्रँदै उत्सव मनाउँदै गरेकी,
हिम/प्रपातमा चिप्लेटी खेल्दै
मेरो अङ्कमालको
न्यान्यो कल्पनामा भुल्दै गरेकी पनि
त्यो तिमी नै हौ !
मरु-तप्तभूमीको गेगरमा
सर्वाङ्ग लडिबूडी गर्दै
मनलाई शान्तपार्ने गरेकी
त्यो तिमी नै हौ !
उज्यालो नहुँदै निद्रा खुल्ने गरेको
रातभर अनिदो छटपटाहटमा
सिरानी पल्टाएर
मलाई बाडुली लाउने
त्यो पनि तिमी नै हौ !
भीरमा पैँताला चिप्लिँदा
मेरो नाम काट्न लजाएर
उफ्फ १ मात्र गरेर निस्सासिने,
स्याउला सम्झेर आँसीले कान्छी औँला टुकृँदा,
मेरो लबेदाको फेर सम्झेर
आफ्नै गुन्यू च्यातेर रगत थाम्ने,
पर्ममा मेरो साटो जाँदा,
दोहोराएर साँधेको आलु थपेर लजाउने,
हो ! पक्कै पनि त्यो तिमी नै हौ !
नीलगगनका पिण्डहरू टुक्राएर
उल्काको क्षेपास्त्र मार्फत
प्रेमपत्र पठाउने पनि तिमी नै हौ !
मैले पत्र पढेँ !
प्रति उत्तर लेखेँ !
पत्र पढ्न अनकनाएर
मेरै सामू ठिङ्ग उभिँदै गरेकी,
सूर्य/प्रकाशको प्रज्वलित लाभा !
मेरो अन्तश्करण भित्र उज्यालो छर्दै गरेकी
त्यो पनि त तिमी नै हौ !
कात्यायन, चाबहिल, काठमाडौं
