‘बुद्धि- रेशम स्मृति स्रष्टा सम्मान’ नौजना लेखकलाई प्रदान - Aksharang
  • २०७९ श्रावाण २९ आइतबार

‘बुद्धि- रेशम स्मृति स्रष्टा सम्मान’ नौजना लेखकलाई प्रदान

कविवर द्वारिका श्रेष्ठका मातापिताको स्मृतिमा स्थापित ‘बुद्धि- रेशम स्मृति स्रष्टा सम्मान’ ९ जना लेखकलाई प्रदान गरिएको छ ।
वि.सं. २०६९ देखि प्रदानगर्न शुरु गरिएको यो सम्मान ‘जलरिका साहित्य प्रतिष्ठान’को वार्षिकोत्सव समारोहका अवसरमा जेठ ३१ गते प्रदान गरिएको हो । जलरिका साहित्य प्रतिष्ठानका अध्यक्ष जलेश्वरी श्रेष्ठ र कवि द्वारिका श्रेष्ठले सम्मानित व्यक्तित्वहरुलाई ताम्रपत्र र जनही नगद रु १ लाख राशि सहित सम्मानित र पुरस्कृत गर्नु भएको थियो ।

कोरोना महामारीका कारण विगत ३ वर्षदेखि आयोजना हुन नसकेकाले यस वर्षको समारोहमा २०७७, ०७८ र ०७९ सालका लागि ९ जना लेखकहरुलाई एकै पटक सम्मानित गरिएको हो । सम्मानित हुनेहरुमा प्रा. डा. वासुदेव त्रिपाठी (समालोचना, २०७७, शशी शाह (कला, २०७८) सुनील पोखरेल (नाट्य, २०७९,) वैरागी काइँला (काव्य, २०७७), नारायणदेवी श्रेष्ठ (काव्य, नेपालभाषा, २०७८), दुर्गालाल श्रेष्ठ (काव्य, २०७९, नेपालभाषा), माया ठकुरी (आख्यान, २०७७), पद्मावती सिंह (आख्यान, २०७८) र भागीरथी श्रेष्ठ (आख्यान, २०७९) रहेका छन् ।

समारोहमा प्रा. डा. अभि सुवेदीले कला र नाट्य, प्रा. डा. लक्ष्मणप्रसाद गौतमले समालोचना र काव्य, प्रा. डा. ज्ञानू पाण्डेले आख्यान र प्रा. ईश्वरी मैयाँ श्रेष्ठले नेपालभाषामा काव्य विषयहरुमा विशेष मन्तव्य व्यक्त गर्नु भएको थियो ।

जलरिका स्रष्टा दम्पती आख्यानकार जलेश्वरी श्रेष्ठको नामबाट जल र कवि द्वारिका श्रेष्ठको नामबाट रिका शब्द लिई दुवैलाई मिसाएर ‘जलरिका’ नामाकरण गरिएको यो साहित्य सेवाका लागि स्थापित संस्था हो । यस संस्थाले हरेक वर्ष फरक क्षमताका प्रतिभाहरुको कृति प्रकाशन, विद्यालयका बालबालिकाहरुका लागि सिर्जनात्मक लेखन तालिम लगायत विविध कार्यक्रमहरु गर्दै आइरहेको छ ।