काठमाडौँ १५ फागुन २०७८

नेपाली हास्यव्यङ्ग्य साहित्यका विराट् प्रतिभा भैरव अर्यालको स्मृतिमा स्थापित भैरव पुरस्कार गुठीले शुक्रबार यस वर्षको भैरव पुरस्कार हास्य व्यङ्ग्यकार नरनाथ लुइँटेललाई प्रदान गरेको थियो । एक लाख ११ हजार एक सय ११ रुपैयाँ राशिको यो पुरस्कार गुठीका अध्यक्ष वरिष्ठ साहित्यिक पत्रकार रोचक घिमिरेले प्रदान गरेका थिए । यस्तै यसै वर्ष घोषणा गरिएको भैरव वाङ्मय पुरस्कार संस्कृतिविद् तेजेश्वरबाबु ग्वंगलाई प्रदान गरिएको थियो । यस पुरस्कारको राशि एक लाख एक हजार एक सय ११ रुपैयाँ रहेको छ । अर्को ५१ हजार एक सय ११ रुपैयाँ राशिको भैरव प्रतिभा पुरस्कार साहित्यकार विमल भौकाजीलाई प्रदान गरिएको थियो ।

कार्यक्रममा पुरस्कृत स्रष्टाहरूबारे श्रीओम श्रेष्ठ रोदन, डा. रमेश शुभेच्छुक र दिव्य गिरीले प्रकाश पारेका थिए । सोही अवसरमा ‘सम्झना भैरव स्मृतिग्रन्थ’ को विमोचन पनि गरिएको थियो । विमोचित कृतिको समीक्षा वरिष्ठ साहित्यिक पत्रकार तथा गुठीका उपाध्यक्ष विजय चालिसे गरेका थिए ।