दीप्स शाह

हृदयमा बोकेर अनगिन्ती वेदनाहरू
आँखामा टाँसेर अनन्त सपनाहरू
घाउहरू चहर्याउँछन् भन्ने जान्दाजान्दै
उच्चाटले सताउँछन् भन्ने बुझ्दाबुझ्दै
आफैँलाई नचिनेर जिन्दगीको जङ्गलमा भौँतारिरहने
ओ षोडशी !
गाजलको पर्दाले दृष्टिहरू ढाकिनुअघि
नियाल सुन्दर दृश्यहरूलाई आफ्नै आँखाले
यो सप्तरङ्गी सन्सार तिम्रोपनि हो ।

बोकेर मनभरि कतिकति रहरहरू
दबाएर छातीभित्रै उमङ्गका ज्वारभाटा
नहिँडे गन्तव्य कहिल्यै भेटिन्न भन्ने
थाहा पाएरपनि
नलम्किए पाइलाहरू उसै सर्दैनन् भन्ने
बुझेरपनि
स्वीकारेर दासता कुँजो बाँचिरहेकी
ओ सुन्दरी !!
जकडिनुअघि पाउजुका जन्जिरले
तिम्रा बलिया खुट्टाहरू
लम्क अगाडि र नापेर हेर
सिङ्गो ब्रह्माण्डलाई आफ्नै खुट्टाहरूले
यो सृष्टिको विशालता तिम्रोपनि हो ।

सुन्दर छन् तिम्रा आँखाहरू
सत्य छन् तिम्रा आवाजहरू
र छन् निष्कलङ्क तिम्रा भावनाहरू
तर
दबिनुअघि कसैका तारिफका बोझले
तिम्रा बलिया काँधहरू
उचालेर हेर आफैँ आफ्नो जिन्दगीलाई
तिमीमै निहित छ
सिङ्गो धरती उचाल्ने वलिष्ठता,
नखुम्चाऊ आफूलाई कोमलताको उपमामा
ओ षोडशी !!
कुवाभित्र गुन्जिने मखमली आवाजले
तिमीलाई बहिरो बनाउँछ
निस्केर बाहिर सयर गर
जीवनको हर अध्यायहरू
यो एकैबारको अनमोल बँचाइ
तिम्रोपनि हो ।

(शाहचर्चित साहित्यकार हुन् ।)
[email protected]