निजगढ, बारा, मंसिर १५ ।

निजगढ साहित्य–कला–संस्कृति समाज, बाराद्वारा बिहीबार कवि एलिसा ढुंगानाको कविताकृति ‘सौन्दर्यको भग्नावशेष’माथि विमर्श कार्यक्रम आयोजना गरेको छ । समाजका अध्यक्ष सुको साइबरको अध्यक्षतामा सम्पन्न कार्यक्रमका प्रमुख अतिथि कवि तथा प्राज्ञ शशी लुमुम्बूले कविताकृतिमाथि प्रकाश पार्दै भने, “एलिसाका कवितामा नारी संवेदना, प्रेम–प्रणय र सामाजिक रूपान्तरणको गहिरो आकांक्षा कलात्मक रूपमा अभिव्यक्त हुन्छन् । उनका कविता सरल, सम्प्रेषणीय र समय–सापेक्ष भावभूमि बोकेका प्रभावशाली छन् ।”

कार्यक्रममा बोल्दै सभाध्यक्ष साइबरले कृतिमा प्रस्तुत नारी संवेदना, प्रेम–प्रणय, समाज परिवर्तनका आग्रह र विद्रोही चेतनालाई उल्लेखनीय योगदानका रूपमा मूल्यांकन गरे । विमर्शमा कवि तथा नेपाली लेखक संघ, बाराका अध्यक्ष सुशान्त न्यौपानेले संग्रहबाट एक कविता वाचन गर्दै आफ्नो रचनासमेत प्रस्तुत गरे । कवि प्रकाश सुवेदी ‘बलु’ले पनि कृतिबाटै एक कविता वाचन गरी कृतिको भावभूमिबारे विचार व्यक्त गरे ।

कवि एलिसाले आफ्नो कविता लेखनको प्रक्रिया, प्रेरणा र भाव–विश्वबारे संक्षेपमा प्रकाश पार्दै, यस्तो अर्थपूर्ण साहित्यिक कार्यक्रम निजगढमै आयोजना गरेकोमा आयोजकप्रति हार्दिक आभार व्यक्त गरिन् । स्थानीय कवि–लेखकहरूको उल्लेखनीय सहभागितामा सम्पन्न कार्यक्रममा ‘सौन्दर्यको भग्नावशेष’ले समकालीन नेपाली कवितामा उभ्याएको दृष्टि, प्रश्न र भावविश्वमाथि जीवन्त बहस भएको आयोजकले जनाएको छ ।