कथा
इटहरी ।
इटहरीमा भएको गजल महफिलमा चार गजलकारहरूले मन छुने प्रस्तुति दिएका छन् । नेपालबिटको आयोजनामा इटहरीस्थित कस्तुरी कलेजमा भएको कार्यक्रममा गजलकारहरू बाबु त्रिपाठी, रुपक बनबासी, दीपा दिपहरि र दीर्घराज प्रियसीले आठ–आठ वटा गजलवाचन गर्दै माहोललाई रमाइलो र भावुक बनाएका थिए ।
गजलकारहरूको प्रस्तुति सुनेपछि उपस्थित साहित्यप्रेमीहरूले ताली र वाहवाही सहित उत्साहजनक प्रतिक्रिया व्यक्त गरेका थिए । पूर्व क्षेत्रबाट आएका साहित्यकार तथा श्रष्टाहरूको उल्लेख्य उपस्थिति कार्यक्रमको आकर्षण बन्यो ।
कार्यक्रमका सभाध्यक्ष रामप्रसाद खरेलका अनुसार नेपालबिटले हरेक शनिवार नियमित रूपमा साहित्यिक श्रृङ्खला सञ्चालन गर्दै आएको छ । ‘साहित्यिक वातावरणलाई जोगाउँदै नयाँ र पुराना सिर्जनागत आवाजहरूलाई साझा मञ्च दिने हाम्रो प्रयास निरन्तर छ,’ उनले भने । इटहरीमा निरन्तर साहित्यिक गतिविधिले सिर्जनशीलता र साहित्यिक चेतनाको विकासमा सकारात्मक योगदान पुरयाइरहेको आयोजकको भनाइ छ ।
