समाचार
जिन्दगी लुगा भए
फुकालेर झुन्ड्याउनु हुन्थ्यो-
कोठाको किलामा
र एकछिन हेरिरहन हुन्थ्यो-
आफू झुन्डिएको आफ्नै कोठाको किलामा !
वर्गीकृत विज्ञापन
विज्ञापन पोस्ट गर्नुहोस् सबै हेर्नुहोस्
जिन्दगी लुगा भए
मिलाएर बेलाअनुसार
सिउनु र सिलाउन हुन्थ्यो,
नमिले उधारेर पूरै जिन्दगी
धागो निकाल्दै सियोले
कैँची लिई आफ्नै हातमा
आफैँले काट्नु र छाँट्नु पनि हुन्थ्यो !
या सुचीकारकहाँ गएर जिन्दगी
केही समय फेरि लुगाकै खातमा
पट्टिई निदाउन पनि हुन्थ्यो !
जिन्दगी लुगा भए
फुकालेर झुन्ड्याउन हुन्थ्यो !
जिन्दगी लुगा भए
बुट्टा मिलाएर आफैँले
रङ्गिनु र रङ्गाउनु हुन्थ्योस
ठाउँठाउँमा प्वाल परे पनि
टाल्न र टाल्न लगाउन हुन्थ्यो,
नमिले पूरै टालेर जिन्दगी
टाल्दाटाल्दै पुरानो छोपेर
नयाँ लाउन र लगाउन पनि हुन्थ्यो !
या रफुकारकहाँ गएर जिन्दगी
केही समय फेरि
जिन्दगीकै धागो निकालेर
मिल्दो रफु भर्न र भराउन पनि हुन्थ्यो !
जिन्दगी लुगा भए,
फुकालेर झुन्ड्याउन हुन्थ्यो !
जिन्दगी लुगा भए
मिलाएर मैलिएको बेला
धुन र धुलाउन हुन्थ्यो,
फुर्सद भए आफैँले साबुन लगाएर जिन्दगी
बाल्टिनमा सफा पानीले फेरि
सुकिलो पखाल्न पनि हुन्थ्यो !
या धोबीकहाँ गएर जिन्दगी
केही समय ढुङ्गेधाराको पानीले चोखिँदै
जाडो दुरैबाट पल्टिएर चहुरमा
दिनभरि न्यानो घाम ताप्न पनि हुन्थ्यो !
या डोरीमा झुन्डिएर चटकीजस्तै जिन्दगी
हावाले उल्टिन र पल्टिन पनि हुन्थ्यो !
खजमजिएर धेरै खुम्चिए जिन्दगी
टेबलमा राखेर पानी छर्कदै आफैँले
इस्त्री लाउन र लगाउन पनि हुन्थ्यो !
साह्रै भए जिन्दगी
एक हप्ताको पूरै छुट्टी लिई
ड्राइक्लिनमा गई फर्किन र फर्काउन पनि हुन्थ्यो !
जिन्दगी लुगा भए
फुकालेर झुन्ड्याउन हुन्थ्यो !
जिन्दगी लुगा भए
फुकालेर आफैँलाई केही समय
टाढाबाट हेर्न र हेराउन हुन्थ्यो,
इनारमा हाम फालेर त्यही जिन्दगी
गहिराइ आफैँले स्पर्श गर्न हुन्थ्यो,
या सपनाको हुस्सु फाटेर जिन्दगी
विपनाको आकाश खुल्न पनि हुन्थ्यो !
या टाउको छुट्टिएको
सपनाको आफ्नै गिँडजस्तो
टोपीमा केही समय फुकाल्न पनि हुन्थ्यो,
नपुगे फेरि दौरा, सुरुवाल र कोटमा
हात, खुट्टा र जिउसमेत फुकालेर
उन्मुक्त आफूलाई आफैँबाट छुटयाई
विपनामा पनि दिउसै सपना देख्न
र देखाउन पनि हुन्थ्यो !
जिन्दगी लुगा भए
फुकालेर झुन्ड्याउन हुन्थ्यो !
जिन्दगी लुगा भए
फुकालेर झुन्ड्याउन हुन्थ्यो-
कोठाको किलामा
र एकछिन हेरिरहन हुन्थ्यो-
आफू झुन्डिएको आफ्नै कोठाको किलामा !
किला ठोकेर आफैँले आफ्नै कोठाको किलामा !
तुलसी दिवस
