काठमाडौं, १०, वैशाख

भोजकुमार धमलाको पहिलो कवितात्मक पुस्तक ‘द सेल्फिस सिटी’ लोकार्पण भएको छ । लामो समयदेखि शिक्षण सेवामा आबद्ध रहेका अंग्रेजीभाषाका कृतिहरु नेपाली साहित्य बजारमा कमै लोकार्पण हुने गर्छन् । तर, पछिल्लो समय नेपाली साहित्यबजारमा अंग्रेजी भाषाका कृतिको विमोचन तथा पुस्तक परिचर्चा पनि राम्रै हुनथालेको नकार्न सकिँदैन ।

नेपाल प्रज्ञा प्रतिष्ठानमा ‘द सेल्फिस सिटी’ कवितासंग्रह महाकविका छोरा पद्मप्रसाद देवकोटाको प्रमुख आतिथ्यतामा विमोचन गरिएको थियो । उक्त कार्यक्रममा अंग्रेजी भाषाको पुस्तक धेरै भएपनि अन्य भन्दा धमलाको ‘द सेल्फिस सिटी’ फरक रहेको बताए । उनले भने, ‘नेपालमा अंग्रेजी साहित्य पनि राम्रो लेखिन थालेको महुसस भयो । पुस्तकमा समेटिएका कविताहरू अर्थपूर्ण र मनन गर्न बाध्य बनाउने खालका छन् ।’

पुस्तक माथि अर्का वक्ता प्रा. डा. अरूण गुप्तोले ‘द सेल्फिस सिटी’ पुस्तक व्याङ्ग्यात्मक शैलीमा पेचिला शब्दको प्रयोग भएको बताए । उनले पुस्तकका बारेमा बोल्दै भने, ‘लेखक धमलाको यो पुस्तकले परम्परागत लेखन माथि प्रहार गर्दै पहिचानको विचार विमर्श गराउन सघाउने छ।’

अंग्रेजीभाषाको पुस्तक प्रकाशन गर्नु नै ठूलो जोखिम मोल्नु रहेको बताए वक्ता प्रा. केशल सिग्देलले उनले भने, ‘नेपालमा रहेर नेपाली पुस्तक प्रकाशन गर्नै गाह्रो रहेको बेला अंग्रेजी भाषाको पुस्तक निकाल्नु आफैमा ठूलो उपलब्धी हो ।’

सञ्चारकर्मी तथा राजनीतिक विश्लेषक मुमाराम खनालले लेखकले बहुआयामिक भूमिकामा अभिनय गरेको पुस्तकमा समाज तथा राजनीतिक परिवर्तनमा समेत महत्वपूर्ण भूमिका रहने बताए । पुस्तकमा विभिन्न खालका परिवेशको भोगाइलाई आकर्षक शैलीमा उतारेको भनाई उनको थियो ।