• २०७९ माघ २४ मङ्गलबार

सम्झनाको लयमा विलीन हुँदै

नेत्र एटम

नेत्र एटम

बादलका आँखाको डिल पुछेर
आँसुले लेखेका एक झरी अक्षरहरू
नदीको मुटुभरि बग्ने भेलजस्तो वेगवान् याद सँगालेर
आएका छन् तिम्रो जिन्दगीमा वास बस्न
समयको पखेटा भएकी ए मालचरी !
कहिले फर्किन्छ्यौ तिमी
मानसरोवरको नीलिमा जस्तो बिछोडको
गहिराइबाट उडान भरेर
प्रेमको महासागर उर्लिरहने मेरो छातीसम्म
बोल न !
पगालेर आफूभित्र जमेको कडा बरफलाई
स्पर्श गर न !
शब्दका नीरव कोलाहलले
कटकटिएको धूलोजस्तो एकान्त उडिरहने
यो मनलाई बिथोलेर
देऊ न जबाफ
निचोरेर आफ्ना विशाल नयन
फूलहरूको साङ्ग्रिला बनाएर
सुकाइदिऊँला सप्पै पीरहरू
छतको डोरीमा लस्करै
पोखिदेऊ न
हत्केलामा अलिकति चाहनाको प्रिय रङ…


नेत्र एटम
[email protected]