समाचार
मुटु भन्दा प्यारो लाग्छ मेरो देशको माटो
यै माटोमा कोरिएको छ मोक्ष खोज्ने बाटो ।
मेरै पुर्खा मिलिजुली बनाएको घर हो
दाजुभाइ एकाघरका साझा यौटै थर हो ।
मेरै श्रमले सिन्चिएको सृजनाको माटो
यै माटोमा कोरिएको छ मोक्ष खोज्ने बाटो ।
हिमाल पहाड तराईका सबै बान्की मेरा
विविधता सजिएको चारकिल्लाको घेरा ।
सबै मिलि बनाउनुछ स्वच्छ सुन्दर माटो
यै माटोमा कोरिएको छ मोक्ष खोज्ने बाटो ।
मेरै आफ्नो सभ्यता छ संस्कृति छ मेरै
राष्ट्र भाव नजागेमा कुल्चि हिंडथे धेरै ।
सुन्दर शान्त बनाउने खोज्दैछु म बाटो
यै माटोमा कोरिएको छ मोक्ष खोज्ने बाटो ।
मुटु भन्दा प्यारो लाग्छ मेरो देशको माटो
यै माटोमा कोरिएको मोक्ष खोज्ने बाटो ।
कैलासकुमार पाण्डेय, परशुराम १२ डडेल्धुरा
