• २०८१ असार ११ सोमबार

हुलाकीको डर

मुहम्मद अल मगुत

मुहम्मद अल मगुत

कैदीहरू !
तिमीहरू जहाँभएपनि
आफ्ना सबै डर, आक्रोश र उदासीलाई
मकहाँ पठाइदेऊ
समुद्रतटका माझीहरू !
आफ्ना खाली जाल र समुद्री बिमारीहरूलाई
मकहाँ पठाइदेऊ ।

किसानहरू !
आफ्ना सबै अभाव, थाङ्ना
चिरिएका पेट र छाती
अनि उखेलिएका नङहरू
मेरो ठेगानामा पठाइदेऊ ।

मानिसका पीडाहरूको
म एउटा बृहत् फाइल बनाउँदैछु
भोकाहरूका ओठको
र अझै पर्खिरहेका उनका आँखाहरूको
एकफेर दस्तखत गराइसकेर
म त्यो फाइल ईश्वरलाई बुझाउनेछु ।

जताततै आएका
सबै अभागीहरूका तर्फबाट
बस ! मलाई एउटै कुराको डर लागिरहेछ
कहीं ईश्वर अनपढ नहोस् ।

अनुवाद: राजेन्द्र शलभ