समाचार
म तिमीलाई भेट्ने छु
कहाँ कसरी थाहा छैन
सायद तिम्रो कल्पनाको
प्रेरणा बनेर
तिम्रो क्यानभासमा चित्रित हुँला
या तिम्रो क्यानभासमा
एक रहस्यमय धर्सो भएर
मौन तिमीलाई हेरिरहूँला
म तिमीलाई फेरि भेट्ने छु
कहाँ कसरी थाहा छैन
अथवा सूर्यको ज्योति बनेर
तिम्रो रङमा घोलिऊँला
या रङहरूको पाखुरामा बसेर
तिम्रो क्यानभासमा छरिऊँला
थाहा छैन कहाँ, कुन ठाउँमा
तर तिमीलाई अवश्य भेट्ने छु
अथवा फेरि एउटा चस्मा बनेर
जसरी झर्नाबाट पानी छचल्किन्छ
म पानीका थोपा
तिम्रो शरीरमा छ्यापूँला
अनि एक शीतल आभास बनेर
तिम्रो छातीमा बसूँला
म अरू त केही जान्दिनँ
तर यतिचाहिँ थाहा छ–
समयले जे गर्नेछ
यो जन्म मेरो साथ जानेछ
यो शरीर खरानी हुनेछ
अनि सबै समाप्त हुनेछ
तर स्मृतिको डोरो
सृष्टिको क्षणजस्तै हुन्छ
म त्यो क्षणलाई रोज्ने छु
त्यो डोरोलाई बेर्ने छु
म तिमीलाई फेरि भेट्ने छु
कहाँ कसरी थाहा छैन
म तिमीलाई फेरि भेट्ने छु ।
अनुवाद: रमण घिमिरे
