मञ्जुराज गिरी

१
हिम्मत गर्नुस् कमसेकम आँट गर्ने गर्नुस्
गोडमेल गर्नुस् सपना छाँटकाँट गर्ने गर्नुस्
आश्वासन मात्रै त हो यो सरकारले साट्ने
सुखदुःख आपसमा साटासाट गर्ने गर्नुस्

२
थिए नानाथरी थिए खुरापाती याद आइरहन्छ
भतभत पोल्छ अचेल छाती याद आइरहन्छ
दुःख लागेन दुश्मनहरूले बरू दुश्मनी निभाए
आफन्तै बन्या थे विश्वासघाती याद आइरहन्छ

३
आफू चढ्दै उकाला झर्दै ओराला काम गर्छिन्
घामले डढेर कालै भएपनि छाला काम गर्छिन्
छाक टार्न उज्ज्वल भविष्य बनाउन सन्तानको
आमाले पिठ्युँमै बोकेर लालाबाला काम गर्छिन्

४
जसरी भएपनि आखिर यो जीवन चल्दो रहेछ
सम्हाल्न सके आफूले आफ्नो मन चल्दो रहेछ
थोरै खुसि भेट्दा आफू सन्तोष हुन सिकेपछी
नभएपनि अरूको साथ समर्थन चल्दो रहेछ

५
गलत बिचार गलत कामले परेको छाप पखालेर
हिड्नुस् कु- बिचारले टेकेका पदचाप पखालेर
रत्नाकरबाट वाल्मीकि पक्का बन्नेछ यो दुनियाँ
आफू बुद्ध बनिदिनुस् आफ्नो सारा पाप पखालेर

(दैलेख निवासी मञ्जुराज गिरी युवाकवि हुन् ।)
[email protected]