• २०७९ असोज १६ आइतबार

गल्लि सुंसां दं

बसन्त चौधरी

बसन्त चौधरी

गल्लि सुंसा दं
मनु माः वयाम्ह जि
सुंसां नापलात ।

जि मतापं ग्वारातुलाः
विचारय् दुनाच्वना
सासः ल्हानाच्वना,
जितः लुइ मखाः
थ्व सुंसां
गय् चीके जिं ?

सु खः थ्व सुंसां थना बिउम्ह
जि थः हे बाफलाः दंक
जिगु कुंलामंनिसें
आत्माया हे सासः कुंक
गन बः काये गन बः काये जुयाः
लितिनातःगु खापा घाराघारां संके
चुइँक्क सः मदु ।

जि न्ह्यसः न्ह्यसःया दथुइ लानाच्वन
जिं जितः हे भिंतुने
जि ‘जि’ हे जुयाच्वने ।

जि कुचाकुचाय्
न्यनाच्वना
चिच्चाः दनाच्वना
थ्वहे जिगु खः
जि ‘दु’ या दसि ।

जिं मसिउ
छाय् कुन जिगु सासः
छाय् जि थःथम्हं कुचाकुचा दलाच्वना,
चिल्लाय् दनेमास्ते वल जि
तर सः पिमज्वः ।
लिसः मदुम्ह जि
लिसः मालाच्वना ।
छुं छुं हे लिसः
गनं थ्वया मवः
छाय् कि,
गल्लि सुंसां दं ।


(कवि बसन्त चौधरीया कविता मुना ‘वसन्त’ पाखें साभार)